赵韩德沪语新作《本地人家过日脚》

本地人家过日脚

作者　赵韩德

动迁离开浦东已经交关年数了，我还常常想起老早个房子，老早个生活。

埃个辰光浦东人盖房子相信“本地泥水木匠”。“本地泥水木匠”手艺好，人厚道，做生活就好像勒拉替自己做。就拿做外墙来讲，伊拉不但要用水泥石灰抹平，还会扎扎实实编一层“小篱竹”。“小篱竹”呈“人”字形交叉，一撇是手指粗的青竹竿五根并排，一捺也是手指粗的青竹竿五根并排，无数双“手”，无数个“人”字，编得一丝不苟，贴紧墙壁，严密结实得几乎不透雨水。青青的小篱竹，乌黑的鱼鳞瓦，刷遍桐油的木板窗，像画。青青的小篱竹慢慢变黄，画便成了另一种色彩；黄黄的小篱竹起了“包浆”，渐渐发红，画就更美了。

本地人又编织半人高个荆树篱笆。荆树枝条又柔又韧，叶子从春天到秋天侪是密密匝匝的，唯一个区别只是绿颜色个深浅不一样。嫩绿个辰光像翡翠，浓绿个辰光像绸缎。墨绿个叶子里有辰光还会躲一条大青虫。勿过勿要怕，伊勿是刺毛虫，也勿是“洋辣子”。大青虫不多日脚就会变成漂亮个小蝴蝶，迎风姗姗起舞。小囡们一边追，一边乱喊：“梁山伯、祝英台！梁山伯、祝英台！”

春末夏初，河鱼泼泼，本地人屋檐下头挂起用柳枝穿起来个烧饼。荆树开花了，浅紫色个花散落了荆树丛和篱笆浪向，就像晚霞散落人间。

篱笆也有用小篱竹编个，闲闲散散，疏疏落落。小竹竿一人多高，梢头剪平，交叉成格子，十分适合丝瓜攀藤、牵牛花搭手、葫芦上架、蔷薇花探头。

篱笆上一般会有一扇高度齐腰个小门。迭扇小门个作用比较特别，因为伊基本呒没防盗功能。或许伊勿是屋门个护卫，而是屋门个“裙裾”吧，给屋门平添妖娆风姿。就像江南少妇，欢喜了腰里围一方蓝印花布——毕竟是“杏花春雨”个所在啊！

至于屋门和腰门个状态配合，内中寓意就更丰富了。要是门和腰门侪关起来，意思就是主人已经外出或者已经休息，请勿打扰。要是屋门关紧，腰门虚掩，就是告诉客人，主人辣辣屋里向，有事请进。要是腰门关紧，屋门大开，表示主人临时跑开，来客稍候。对熟人来讲，迭个辰光也可以“登堂入室”，先到屋里坐一歇。假使屋门腰门统统敞开，屋里向又呒没人，客人就会心里不安：发生了啥紧急事体，竟让主人匆忙跑开？迭个辰光，熟人就会守在门外，代主人看屋，心里暗祝主人平安。

腰门和屋门也有相互磕碰的时候。大多是因为小囡奔进奔出嬉戏白相；或许是故交忽至，“倒着衣裳迎户外，尽罗儿女拜堂前”；也或许是亲人远行，“急趁天明催舻发，开门斜月带残星”。

本地人就搿能自自然然过日脚。

谨　　记

本文作者赵韩德先生自荐于沪东中华块群聊中与造船委会员分享登报之喜

赵韩德：小文一个，见9.3<新民晚报·夜光杯·上海闲话> 谢谢！